( يا كنيسة متدمعيش )

صعبانة عليا يا كنيسة
يا بيت الصلاة و التسابيح 
دموعك مش رخيصة
دى قادرة تنور مصابيح

عارفك يا كنيسة موجوعة 
من فعل الإرهاب و العما 
أطمنى صلاتك مسموعة
واصلة لحد آخر سما

يا كنيسة ربنا مش عاجز 
هيجيب حقك أضعاف أضعاف 
مش هتمنعه اى حواجز
أيدين ربنا مش ضعاف

يا كنيسة أمسحى دموعك
ليلك نهاره جاى
بكرة هتقيد شموعك 
هتملى الدنيا ضى

مهما كانت بيبانك متقفلة 
ربنا هيبرد نارك 
اصل عيونه مش متغفلة 
بكرة هيرد تارك

النهاردة بابك حزين مقفول 
لكن قلبك بالسلام مفتوح
المسيحيين شايلينك فى العقول
جوة فى القلب و الروح

جرسك صوته بيرن
فى القلب و الوجدان
عارفه لسة بيحن 
لصوته مع الأدان

يا كنيسة متدمعيش 
حقك راجع راجع 
يا كنيسة متبكيش
حزين عليكى الجامع

كلمات : محمد فتحى


2014 united copts .org
 
Copyright © 2023 United Copts. All Rights Reserved.
Website Maintenance by: WeDevlops.com