أنا القبطي أقول :السيد الرئيس لا يحق لك ذلك..
بقلم: نبيل بسادة
انا مش عارف ليه الرئيس السيسي يعمل و يسمح كل يوم و التاني باضطهاد الأقباط. انا مش قادر اصدق ان هذا ممكن يحصل مع شعب داخل بلده ..شعب قوامه حوالي 30 مليون قيطي. أصبحوا يعيشون تحت نير الأضطهاد و عدم الأمان في زمن يعتبر من أسوأ الأزمنة و أمرها اللي بيمر بها المسيحيين في مصر..
من أيام الرئيس أنور السادات و احنا نعاني الأمرين. و للأسف كل ما نسكت كل ما الأضطهاد عمال يزيد و لا في خشي و لا أحساس بمعني الأخلاق و المباديء . زمن أصبح الواحد يكره النهار لما يطلع علشان كل يوم في خطف و اغتصاب و سرقة و فرض اتاوة كأننا بنعيش في وسط عصابة بتتحكم في دولة و مسنودة من الدولة ..
و انت ياسيادة الرئيس مش عارف ان احنا بني آدمين و أحرار ولا يمكن أستعبادنا ..هو انت فاكرنا ايه..هو علشان المسيحي عنده أخلاق و مباديء دين له سمات عالية في التسامح و محبة المسيء و عدم الأنتقام ..يبقي ده نتيجة تيجي ضده مش في صالحه.. ده اللي بيحصل مع الأقباط لو حصل مع حيوان في اوروبا او امريكا المتسبب في الأذي بيدخل السجن. .ده أحنا بنعيش زمن أسوأ من الأساءة بنفسها..
يا سيادة الرئيس ما فكرتش مرة تحط نفسك و انت رب اسرة مكان المسيحي اللي بينقتل و يخطفوا بنته و يغووها و يغيروا لها دينها واللي بيطلبوا منه فدية له او لأولاده او زوجته..
يا سيادة الرئيس ما فكرتش و انت رب اسرة يكون شكلك ايه قدام زوجتك و اولادك لما مجموعة من الغوغاء مسنودين من جهات من الدولة تييح و تجبرك بدفع اتاوة و يساوموك انت و امام اسرتك ولازم تطرد من بيتك ..و بسبب الجبروت مضطر انك تمشي و تصبح لاجيء في بلدك مش عارف تنيم مراتك و اولادك فين ..راح يكون مشاعرك ايه و رجولتك ايه ؟
يا سيادة الرئيس ما فكرتش و انت رب اسرة انك تخرج من بيتك و اولادك و بناتك خايف ترسلهم الي المدرسة و لا الجامعة ومش عارف ان كانوا راح يرجعوا و لا مش راح يرجعوا ..و ايه اللي ممكن يحصلك و انت ماشي في الشارع..علشان انت مسيحي..
سيادة الرئيس انا آسف اني بتكلم معاك بهذا الأسلوب ..ما هو انا الكيل طفح بيا.. و مش قادر اتحمل أكثر من كده..سيادتك سيبت ناس مش أعداء المسيحيين فقط ..دول ناس أعداء البشرية واعداء أنفسهم..أنت تعلم ان السلفيين و كل الأسلاميين بيتلذذوا بتعذيب و أضطهاد المسيحيين..دي عقيدة عندهم..طيب سايبهم ليه ..يعملوا اللي بيعملوه..
أحنا يا سيادة الرئيس أنتخبناك انت..مش السلفيين و لا الأسلاميين .. و لا حد من السادة المسؤولين اللي بيعاونوك و بتثق فيهم..أحنا مالناش ذنب ..أحنا أنتخبناك لأنك راجل تقدر كل ما هو مصري ..تقدر يعني راجل يهان و يتبهدل امام اسرته ..انا أعلم و متأكد انك ليس عندك تعصب و انك راجل عادل..لكن اللي بيحصل ده ..انت اللي مسؤول عنه و ليس أي مسؤول آخر ..مهما تكن وظيفته و مركزه في الدولة..
سيادة الرئيس لن اقول لك و اعدد ايه اللي بيحصل مع المسيحيين من طرد و تهجير و حبس وتهم باطلة بأزدراء الأديان و غيرها من التهم..القائمة كبيرة و طويلة ده مسلسل طويل ..و القايمة كبيرة و كثيرة ..و مخجلة أنها تعلن..لأنها تسيء للمسؤول الكبير..اللي هو رئيس الجمهورية..و انت عارفها كلها..
سيادة الرئيس الناس اللي حاوليك اللي سايبين الحبل علي الغارب هم السبب اللي خلوني اكتب لك هذا الكلام..أعمل ايه.؟؟ خاليك مكاني و انت راجل حر و عندك مباديء.. ما هو الواحد لازم يتكلم و يصرخ..و أكيد في يوم من الأيام ربنا راح يسمع هذ الصراخ..زي ما سمع قبل كده..ما هو ربنا اللي أؤمن به ..لا ينعس و لا ينام.. و يعرف عدد حبات رمل البحار.. و يعرف عدد النجوم..و يعرف عدد رؤوس شعور كل واحد فينا..و هو اللي قال: لي النقمة أنا أجازي ..من يمسكم يمس حدقة عيني..
سيادة الرئيس المركب بتاعة الوحدة الوطنية بتغرق..أعمل حاجة ياربان السفينة..أمسك انت الدفة بتاعة المركب..و وصلنا لبر الأمان..ده اللي بيصرخ مش المسيحيين فقط..ده كمان كل اللي بينادوا بالدولة العلمانية..ال40 مليون اللي عملوا 30 يونيه..
سيادة الرئيس لا يحق لك ان تترك دفة السفينة لربان غيرك ..يتمرن علينا..و يبهدلنا..و يخالينا نتهمك انك انت السبب..الوطن اللي لا أحس فيه به بالأمن و بالأمان لا يمكن أن أشعر فيه بالثقة..غيرك هو السبب اللي خلاني أبدل مشاعري و انا آسف و مضطر و حزين..
تحياتي
نبيل بسادة