عيد ميلادك حالاقاتك برجالاتك
حالاقاتك برجالاتك..... وأدلع يابيبى فى عيد ميلادك
دا كل سنه وجنابك طيب .... ياريس ياضاحك وطيب
تمانين سنه شب وصبيب....كفايه قلبك للشعب قريب
بتقول جنابك شايف .... بتقول جنابك حاسس
ولكل حاجه عارف ....... وبوجع الخلق لامس
صحيح انت حاسس ..؟
صحيح أنت لامس ..؟
حاسس باللى مطحون ..... وبهم عياله لايص
والناس جوه السجون.... بتهم تلفيق هجايص
طب سايب ليه حكومه ... غرقانه ف مشاكل
ومصر منها مغبونه...... وفضحانا بجلاجل
وعندك مليون طاحونه..... والناس مش لاقيه تاكل
صحيح ياريس حاسس ...؟
صحيح جنابك لامس ...؟
أخاف تكون بتصحى ... م النوم واليوم بتسعى
على رحله أو زياره ..... لأوروبا تعمل تجاره
و معونات العم سام ...... بتترمى فوق العماره
دولارات مليارات... والحظ عندك فدادين شطاره
وشعبك ياعينى حاله ... على ماهوه هوه حاله
على رب كريم تكاله ... ع البركه آهو ماشى حاله
ينحت فى الصخر يشقى .... مالاقيش لقمه لعياله
وإزاى تبقى طيب جنابك ... وإزاى بقى قريب لناسك
قاعدين بس ليكم بنسمع .... فى آمال وعود وحكايات
مشاريع عمارات بتطلع .... وقالوا إيه مافيش أزمات
والحال علينا بيزيد قساوه .... وحكومه عايشه ف الطراوه
هليبه جشعه ومابتشبع ... وف كل مواجهه بيزيدوا غباوه
ويوم على يوم يمر ..... ونقول راح هايجيلنا فارس
يدوق معانا علقم ومًر ..... لوجعنا وهمومنا حاسس
يطلعله غول ياخده بهوجه ... أو قضيه وتشيله موجه
يرموه فى ركن أوضه .... والحبس يبقى ياخويا موضه
ويضيع صوته ومايقدر .... يا ويلداه حتى يهامس
ويضيع أمل كان للشباب ... وعريس كان للعوانس
يا ريس أفرح وهيص ... وأتهنى بعيد ميلادك
وأشرب وكل وجيص ..... أنت وعيال عيالك
ماهى بِِِْليَه ياعمو ... ولِعبت معاك
وشلة لصوص إتلمّّو.... كتير وراك
وتهليبات ومليارات .. بتملا خزاين بنوك جنابك
والشعب أهو عايش.... قال إيه يعنى لو كان عايش
والناس حالها يغُم .... وقالوا على الفرحه السلام
بالألم الخلايق بتصبح ... وعلى وجعهم ترجع تنام
والهّم يوم عن يوم ... يكتر يزيد
والحزن شىء ياقلبى ... مابقيش جديد
أسعار بتولع فيها نار ..... وكل يوم تزيد دمار
وشعب شايل كتير وحامل .. حمل مايشلوش حمار
ولا حد عايز حتى ينفض ... عنه شوية غُبار
الحال ياريس ... أصبح خطير
والشعب صابر ....عليك كتير
طوابير طويله.... قُدام مخابز
وناس ذليله ...م الفجر تحاجز
ناس تندهِك ...... ناس تِندِعِك
ستات فى الزحمه توقع.... ويموت مرضى و عجايز
راحوا ضحايا الجوع .... وعملولهم للموت جوايز
قالوا هاييبقوا شُهدا ... ومين مايبقى للشهاده عايز
ياعم هيص .... وكل حفله وانت طيب
ما أنت ريس... وغصب عنا هاتبقى طيب
وهابى بَيرس داى تو يوه
والشعب يلعن أبو خاش أبوه
وحالاقاتك برجالاتك
وإتدلع يابيبى فعيد ميلادك شفيق بطرس